A visión do movemento Wikimedia é conseguir un mundo no que todas as persoas teñan acceso libre á suma de coñecementos e poidan participar na súa construción colectiva. Seguimos as filosofías do coñecemento e a cultura libres, que defenden o dereito fundamental de acceso a estes.

Wikipedia, a enciclopedia que todo o mundo pode editar, é o noso proxecto máis coñecido, pero traballamos con outros 11 proxectos colaborativos de coñecemento libre na rede. Por exemplo, Wikidata, unha base de datos estruturada; ou Wikimedia Commons, o maior repositorio multimedia gratuíto do mundo.